تحياتي للجميع اتمنى ان تعجبكم قصيدة


كوة على كلبي دست كوة على روحي قسيت
وك مو هينة اجي بدمعتي واوكف اباب البيت
دكيت بابك خجل وبلا خجل دكيت
وارتجف بية الجدم وعلى الهوى اتوجيت
وفتحت بابك الي سلمت ما رديت
وسمعتك تكلي بهمس يا ريت لو ما جيت
معذور تكون قلقت هذا القلق مشروع
اني ادري جيتي الك تخلق الف موضوع
على الخالي صدگ الك ما جيت يالمحبوب
مرتني لحظة ضعف وحسيت كلي ذنوب
ردت الله يغفر الي بس بيمن اتبارك
غمضت عيني وغصب جابتني يم دارك
لا ترتجف يا حلو شامخ جبل خليك
ولا تهتم بلي مضحكك اهتم بلي مبجيك
تدريني هالساع وش شفت ؟؟ وش عشت ؟؟ وش عانيت ؟؟
ادركني وكت العشة وبعبرتي اتعشيت
لاكيتني وترتجف ثاريك بس تصيح
وزيدت حزني حزن لو ادري ابد ماجيت
قف ياحبيب الكلب واسمعني اترجاك
لو تدري ليش اعتني ولو تدري ليش اهواك
لولاك ما انجرح وعيوني ما تبجي
ولولاك ما خرست وبعالي صوتي احجي
ولولاك ما تيهت وامشي وره اليمشون
ولولاك ما طفحت واحجي وره اليحجون
ولولاك ابقى صلب ما تمرني اللوعة
وعيوني مثل الحجر ما تعرف الدمعة
وتكلي شنو هل الوزه وشجابني بهالليل
رغم الجرح بيه جرح والحيل ما بيه حيل
ورغم النهار انكضى والدنيا صارت ليل
صح جيتي محرجة وصح جيتي اتخجل
مغصوب اجي بهالدرب ومن شامت اتوسل
چي عيني لما بكت محد ينشف بكاي
والروح طير اعطشت وتريد كطرة ماي
وية الغريب اليمر يا وسفة اتساويت
ومخذول انا دنكت وبدمعتي ترديت
وتريد اوضح الك شيهمني هذا البيت
اتريد اكلك بعد شيهمني هذا البيت
هنا طفولة ادفنت بيها اندفن علمي
وهنا بقى دفتري واوراقي وقلمي
وهناك منيتي وهناك حضن امي
وهناك باقة ورد مكتوب بيهه اسمي
وهناك كومة حجر سويته بيت ابيوت
وهناك كلبي انولد وهناك شفت الموت
وتريد اوضح بعد ليش اعتنيت وجيت
ضل هيج لا تعتذر مهما الي اشتاكيت
وميهمني انته اتعبت وميهمني انته بجيت
صح بالوجه رحبت بس بالكلب صديت

تحياتي

شكرا لك ع الموضوع المميز
لك اجمل تحيه
ننتضر مزيدك

شكرا عل موضوع الجميل


تقبل مروري